Die toekoms van beroepsopleiding

Bo-Karoo Opleiding (BKO) is ‘n privaat, nie-winsgewende beroepsopleidingsinstelling wat deel vorm van die Solidariteit Beweging. Met ‘n aanvanklike groep van meer as 110 studente in 2023, bied die instelling ‘n unieke benadering tot opleiding wat studente blootstel aan ‘n plattelandse gevoel en ervaring.

Wat BKO onderskei van ander hoëronderwysinstellings, is die kampus sonder mure in ‘n veilige omgewing wat studente toelaat om ten volle by die Orania-gemeenskap in te skakel. Ons studente het die voorreg om in dié rustige omgewing te leer en te groei terwyl hulle volwaardige beroepsopleiding in bou- en siviele konstruksie, loodgieterwerk, elektries, boerderybestuur en tuisversorging ontvang.

By BKO is ons nie net gerig op die ontwikkeling van vaardighede nie, maar ook op die bevordering van gemeenskapsbetrokkenheid. Ons moedig studente aan om in koshuisverband deel te neem aan aksies, asook kultuur- en sportaktiwiteite. Ons is trots op ons Afrikaner-kultuur en studente word aangemoedig om vrylik hul geloof en kultuur te beoefen en uit te leef.

Die toekoms van BKO is opwindend en ons beleef positiewe groei. Ons het onlangs die bestaande fasiliteite vergroot met twee nuwe werkswinkels en vier klaskamers om aan die toenemende vraag na opleiding te voldoen. Daarbenewens is daar nuwe studenteverblyf wat in Januarie 2024 in werking tree en verdere koshuisuitbreidings wat beplan word vir 2025.

Bo-Karoo Opleiding gaan van krag tot krag terwyl ons vryheid deur opleiding en arbeid bevorder. Ons glo dat ons studente ‘n hoopvolle toekoms kan bou deur middel van gehalteopleiding en die ontwikkeling van praktiese vaardighede.

Kontak BKO by 053 110 0620 of per e-pos by ontvangs@bokarooopleiding.co.za vir navrae.

DOEN NOU AANSOEK

Johan Klinck

Johan Klinck bring 37 jaar se kennis en ervaring na Bo-Karoo Opleiding (BKO) as departementshoof van Ambagte.

Na ses jaar by Denel Aviation en 31 jaar by die Motheo TVET College, in Bloemfontein, het Klinck die groot skuif na Bo-Karoo Opleiding gemaak.

“My droom vir BKO is dat ons ambagsmanne oplei wat hoog in aanvraag sal wees in die arbeidsmark,” sê Johan. Verder sien hy ook uit na die uitbou van die tegniese departement.

Johan beskryf homself as selfgemotiveerd, doelgedrewe, ’n spanspeler en toegewyd aan sy werk. Deel van sy planne vir BKO is om nuwe programme te implementeer wat nóú, asook in die toekoms, deur die arbeidsmark benodig word.

“By BKO dink ons toekomsgerig en ons is opgewonde oor die groei wat ons beleef. Ons het nog baie potensiaal en ontwikkel elke dag net verder,” sê Paul Vogel, uitvoerende hoof van BKO.

Johan het sy ambag deur Denel Aviation gedoen, waar hy as ’n radiomeganikus gekwalifiseer het. In dieselfde tyd het hy sy nasionale N-diploma by Kempton Park Tegniese Kollege verwerf, waarna hy sy hoӫr onderwys diploma deur die Universiteit van die Vrystaat gedoen het.

BKO sien uit na die groot bydrae wat Johan tot die organisasie gaan lewer.