Landboustudente woon plaasveiligheidkursus by

Plaasveiligheid en die vaardighede wat daarmee saamgaan is deel van ons lansbougemeenskap se lewe in Suid-Afrika. Om seker te maak ons studente is ook op hierdie gebied toegerus, bied ons dit as ‘n waardetoevoegingskursus aan.

Op 16 Augustus 2023, het ons vir ons boerderybestuurstudente die geleentheid gebied om ‘n kursus by te woon, aangebied deur Leo Prinsloo, van The Edge Shooter Academy. Hierdie kursus is ‘n inisiatief wat op die been gebring is deur AfriForum se Bo-Karoo Streekstak en is ‘n jaarlikse instelling. Die tak het gehelp om die studente se kostes te befonds, omrede hulle graag wil bydra tot die ontwikkeling van ‘n veelsydige landboustudent. Tydens hierdie kursus is studente toegerus met ‘n inleiding tot basies plaasbeveiliging, identifisering van potensiële risiko’s, fisiese beveiliging, basiese vuurwapenhantering en die hantering van skietwonde.

“Ons het besef dat ons altyd paraat moet wees in ons omgewing, nie net op die plaas nie maar oral waar ons beweeg.” – Stephan Fourie

Johan Klinck

Johan Klinck bring 37 jaar se kennis en ervaring na Bo-Karoo Opleiding (BKO) as departementshoof van Ambagte.

Na ses jaar by Denel Aviation en 31 jaar by die Motheo TVET College, in Bloemfontein, het Klinck die groot skuif na Bo-Karoo Opleiding gemaak.

“My droom vir BKO is dat ons ambagsmanne oplei wat hoog in aanvraag sal wees in die arbeidsmark,” sê Johan. Verder sien hy ook uit na die uitbou van die tegniese departement.

Johan beskryf homself as selfgemotiveerd, doelgedrewe, ’n spanspeler en toegewyd aan sy werk. Deel van sy planne vir BKO is om nuwe programme te implementeer wat nóú, asook in die toekoms, deur die arbeidsmark benodig word.

“By BKO dink ons toekomsgerig en ons is opgewonde oor die groei wat ons beleef. Ons het nog baie potensiaal en ontwikkel elke dag net verder,” sê Paul Vogel, uitvoerende hoof van BKO.

Johan het sy ambag deur Denel Aviation gedoen, waar hy as ’n radiomeganikus gekwalifiseer het. In dieselfde tyd het hy sy nasionale N-diploma by Kempton Park Tegniese Kollege verwerf, waarna hy sy hoӫr onderwys diploma deur die Universiteit van die Vrystaat gedoen het.

BKO sien uit na die groot bydrae wat Johan tot die organisasie gaan lewer.