Personeellid strewe na uitnemendheid en ’n hartlike verwelkoming

In die hart van die Orania-gemeenskap het Karin de Klerk (33), ons nuwe ontvangsdame, haar plek gevind.

Karin het skoonheidsterapie, spesifiek Health and Skin Care Therapy, aan die Isa Carstens-instituut in Stellenboch studeer. Hier het sy ’n passie vir omgee ontwikkel, wat sy nou aanwend in die verwelkoming van kliënte en besoekers by BKO.

Sy spog met indrukwekkende werksondervinding wat sy tydens haar tydperk by ConfiDent Palm Dentist in Dubai opgedoen het. As ’n ontvangsbeampte by die tandheelkundige kliniek, het sy bekwaamheid in kliëntediens, kommunikasie en adminnistrasie opgebou. Hierdie vaardighede het haar voorberei vir haar taak by BKO.

Vriendelikheid is een van die kenmerkende eienskappe wat Karin ’n groot aanwins vir die BKO-span maak. Sy het ’n innemende persoonlikheid wat dit maklik maak om ’n band met haar te vorm. Haar vriendelikheid gaan gepaard met ’n positiewe ingesteldheid, wat maak dat diegene wat BKO besoek op hul gemak is.

Sy beoog om die kliëntediens te verbeter deur uitsonderlike diens te lewer. Sy glo daarin om akkurate inligting aan almal te verskaf en te sorg dat elke persoon wat haar pad kruis ’n positiewe ervaring sal hê. Sy wil graag ’n verwelkomende en warm atmosfeer vir alle besoekers skep. Karin glo dat die ontvangslesenaar die eerste indruk skep en daarom ’n baie belangrike rol in BKO se sukses speel.  

Sy is vasbeslote om verhoudings met kliënte, studente en kollegas te smee en sodoende die gemeenskap van BKO en Orania nader aan mekaar te bring.

Karin deel ’n droom met die res van die BKO-familie. Sy streef na uitnemendheid en wil graag sien dat BKO een van die beste opleidingsinstellings word. Met haar passie vir mense en dienslewering sal sy ’n integrale deel van hierdie droom wees. Sy is trots om deel van die BKO-familie te wees en sien uit na ’n lang en suksesvolle loopbaan hier.

Karin de Klerk

Johan Klinck

Johan Klinck bring 37 jaar se kennis en ervaring na Bo-Karoo Opleiding (BKO) as departementshoof van Ambagte.

Na ses jaar by Denel Aviation en 31 jaar by die Motheo TVET College, in Bloemfontein, het Klinck die groot skuif na Bo-Karoo Opleiding gemaak.

“My droom vir BKO is dat ons ambagsmanne oplei wat hoog in aanvraag sal wees in die arbeidsmark,” sê Johan. Verder sien hy ook uit na die uitbou van die tegniese departement.

Johan beskryf homself as selfgemotiveerd, doelgedrewe, ’n spanspeler en toegewyd aan sy werk. Deel van sy planne vir BKO is om nuwe programme te implementeer wat nóú, asook in die toekoms, deur die arbeidsmark benodig word.

“By BKO dink ons toekomsgerig en ons is opgewonde oor die groei wat ons beleef. Ons het nog baie potensiaal en ontwikkel elke dag net verder,” sê Paul Vogel, uitvoerende hoof van BKO.

Johan het sy ambag deur Denel Aviation gedoen, waar hy as ’n radiomeganikus gekwalifiseer het. In dieselfde tyd het hy sy nasionale N-diploma by Kempton Park Tegniese Kollege verwerf, waarna hy sy hoӫr onderwys diploma deur die Universiteit van die Vrystaat gedoen het.

BKO sien uit na die groot bydrae wat Johan tot die organisasie gaan lewer.