Hiér word die moue ook opgerol vir pret

By Bo-Karoo Opleiding word die mou nie net opgerol vir harde werk nie, maar ook vir pret. Deel van ’n student se ontwikkeling is ’n gesonde studentelewe. Die studentelewe by Bo-Karoo Opleiding (BKO) rus op 5 pilare naamlik die koshuislewe, sport, kultuur, leierskap en diensbaarheid wat ondersteun word deur studente ondersteuning.

Nie net word ’n nuwe koshuis ’n tuiste vir vele nie, maar word daar ook planne beraam om die studentelewe net nog meer te ontwikkel. Marike Labuchagne, hoof van studentesake, sê dat daar tans beplan word aan die eerstejaarskamp, -orientering en -konsert. Stephan Fourie is ’n landbou-student en ook die primarius van die nuwe koshuis wat tans bekendstaan as “Olienhout”. Hy sien uit na die planne om die landbou-sektor verder uit te brei deur meer rigtings by te voeg. Verder kan studente ook uitsien na koshuisligas en ’n afskopfees in Februarie.

Studente geniet dit om aksies tussen die verkillende koshuise, Heldehuis, Duiker en Steenbok Herberg, te hou. Sportsoorte sluit onder andere in rugby, netbal, hokkie, en daar word planne beraam om swem verder te ontwikkel asook om jukskei en tafeltennis, selfs toutrek op die been te bring. Die netbalspanne neem ook deel aan die streeksliga.

Die koshuise het ook gesonde kompetisie tussen mekaar. Die studente en lektore daag mekaar gereeld uit. Uitdagings strek van lengtes swem, hare vleg tot aartappel skil of balle oor die rugbypale skop. “Deur die uitdagings wat ons hou, vorm ons ’n sterker band tussen studente en lektore waar ons saam hulle kan werk, leer en selfs kuier as die geleentheid nader kom,” sê Marco Coetzee studenteraadvoorsitter by BKO. Koshuise kan punte deur deelname versamel en ook deur aktiwiteite te wen. Die koshuis met die meeste punte word aangewys as die wenkoshuis van die jaar.

Neitjie Barnard primaria van Duiker Dameskoshuis sê “Ons is ‘n kampus sonder mure, ons is deel van die dorp, daar is nie grense waar ons kampus stop nie. Ons is familie.” Aksies word talle kere geïntegreer met die dorp en samewerking met Orania word aangemoedig. Dit is werklik ’n gemeenskap wat die studente help ontwikkel. Fourie sê dat die studente groet mekaar, studente skakel gou in en elke dag word daar iets waardevol geleer.

”Ons studentelewe is vol vreugde ten spyte van die uitdagings en harde werk en ons het baie vriendskappe gebou wat ‘n leeftyd sal hou,” sê Barnard.

Volg die aksies op BKO se sosiale media blaaie.

Johan Klinck

Johan Klinck bring 37 jaar se kennis en ervaring na Bo-Karoo Opleiding (BKO) as departementshoof van Ambagte.

Na ses jaar by Denel Aviation en 31 jaar by die Motheo TVET College, in Bloemfontein, het Klinck die groot skuif na Bo-Karoo Opleiding gemaak.

“My droom vir BKO is dat ons ambagsmanne oplei wat hoog in aanvraag sal wees in die arbeidsmark,” sê Johan. Verder sien hy ook uit na die uitbou van die tegniese departement.

Johan beskryf homself as selfgemotiveerd, doelgedrewe, ’n spanspeler en toegewyd aan sy werk. Deel van sy planne vir BKO is om nuwe programme te implementeer wat nóú, asook in die toekoms, deur die arbeidsmark benodig word.

“By BKO dink ons toekomsgerig en ons is opgewonde oor die groei wat ons beleef. Ons het nog baie potensiaal en ontwikkel elke dag net verder,” sê Paul Vogel, uitvoerende hoof van BKO.

Johan het sy ambag deur Denel Aviation gedoen, waar hy as ’n radiomeganikus gekwalifiseer het. In dieselfde tyd het hy sy nasionale N-diploma by Kempton Park Tegniese Kollege verwerf, waarna hy sy hoӫr onderwys diploma deur die Universiteit van die Vrystaat gedoen het.

BKO sien uit na die groot bydrae wat Johan tot die organisasie gaan lewer.