MEDIAVERKLARING – Rekordgetal studente vir 2025 by Bo-Karoo Opleiding verwag

Bo-Karoo Opleiding (BKO) in Orania, Noord-Kaap, verwag ’n rekordgetal studente vir 2025. Nuwe studenteverblyf word gebou, nuwe werkswinkels is vanjaar geopen en boonop spog BKO met ‘n splinternuwe kenteken. Nuwe senior personeel het ook by die dinamiese span aangesluit.

“Ons is gereed om ’n groot impak op die nuwe groep studente se lewens te maak,” sê Paul Vogel, uitvoerende hoof van BKO. “Ons is dankbaar oor die jaarlikse groei in studentegetalle en sien uit na die verwagte groei vir 2025.”

BKO is ’n opleidingsinstelling wat tans vyf nasionaal geakkrediteerde kwalifikasies aanbied. Dit sluit in boerderybestuur, bou- en siviele konstruksie, loodgieter, elektries en tuisversorging. By BKO verwerf studente nie net ’n kwalifikasie nie, maar word hulle tot roepinggedrewe volwassenes gevorm wat die arbeidsmark stewig gegrond in hul geloof en kultuur betree.

BKO verseker nie net goeie kwalifisasies en ervaring nie, daar word ook ’n sterk fokus op ’n gesonde studentelewe geplaas. In Orania kan studente vrylik en veilig student wees en op die kampus sonder mure rondbeweeg. Sodoende vorm hulle deel van die dorp en die gemeenskap. Die studentelewe floreer in die koshuise Duiker, Steenbok, Herberg en Vaalbos, waar studente kan woon. Studente in die dorp of wat van private verblyf gebruik maak kan ook by die daghuis, Heldehuis, aansluit om aan die studenteaktiwiteite deel te neem.

Verder geniet studente verskeie sportsoorte, kultuuraktiwiteite en leierskapontwikkeling, en leer ook oor diensbaarheid binne ‘n trotse Afrikanergemeenskap. Studente het ook toegang tot verskillende ondersteuningstrukture gedurende hul studieloopbaan. Hulle integreer ten volle met die Orania-gemeenskap en bou saam aan ’n volhoubare toekoms.

Aansoeke vir 2025 maak op 3 April 2024 oop. Deur aansoek te doen, neem jy jou eerste tree na ’n hoopvolle toekoms. Skep saam moed vir die toekoms deur by Bo-Karoo Opleiding te studeer. Besoek BKO se webblad by https://bko.co.za/ vir meer inligting en om aansoek te doen. Navrae kan aan 053 110 0620 gerig word, of stuur ’n e-pos na ontvangs@bko.co.za.

 

Mediakontak:

Carla Loots

053 110 0620

carla@bko.co.za

Johan Klinck

Johan Klinck bring 37 jaar se kennis en ervaring na Bo-Karoo Opleiding (BKO) as departementshoof van Ambagte.

Na ses jaar by Denel Aviation en 31 jaar by die Motheo TVET College, in Bloemfontein, het Klinck die groot skuif na Bo-Karoo Opleiding gemaak.

“My droom vir BKO is dat ons ambagsmanne oplei wat hoog in aanvraag sal wees in die arbeidsmark,” sê Johan. Verder sien hy ook uit na die uitbou van die tegniese departement.

Johan beskryf homself as selfgemotiveerd, doelgedrewe, ’n spanspeler en toegewyd aan sy werk. Deel van sy planne vir BKO is om nuwe programme te implementeer wat nóú, asook in die toekoms, deur die arbeidsmark benodig word.

“By BKO dink ons toekomsgerig en ons is opgewonde oor die groei wat ons beleef. Ons het nog baie potensiaal en ontwikkel elke dag net verder,” sê Paul Vogel, uitvoerende hoof van BKO.

Johan het sy ambag deur Denel Aviation gedoen, waar hy as ’n radiomeganikus gekwalifiseer het. In dieselfde tyd het hy sy nasionale N-diploma by Kempton Park Tegniese Kollege verwerf, waarna hy sy hoӫr onderwys diploma deur die Universiteit van die Vrystaat gedoen het.

BKO sien uit na die groot bydrae wat Johan tot die organisasie gaan lewer.