TUISsorgassistent
Die ses maande lange Tuissorgassistent-kursus fokus op al die praktiese vaardighede wat jy nodig het om iemand met respek en deernis te help en te versorg.
Kwalifikasie
- Gedeeltelike kwalifikasie: Tuissorgassistent, NKR-vlak 2, 68 krediete, SAQA-ID: 104779
Toelatingvereistes
- Graad 9-sertifikaat
- 18 jaar en ouer
Modules
◊ Fundamentele beginsels van tuisversorging: etiese raamwerk waarbinne versorging plaasvind.
◊ Identifiseer en rapporteer probleme en behoeftes van pasiënte, hul gesinne en huishoudings.
◊ Fisiese versorging beplan deur die verpleegkundige soos pynbeheer, posisionering, mobilisasie, eerstehulp, ondersteuning tydens psigiese gesondheidsprobleme, versorging van kwesbare en bejaarde persone, uitvoering van basiese ondersoeke en toetse, en hulpverlening met wondversorging.
◊ Bemagtiging van pasiënte, hul gesinne en huishoudings deur middel van onderrig in fisiese versorging.
◊ Intreevlak noodhulp
◊ Werkservaring word in Orania se plaaslike ouetehuis en tydens tuisbesoeke in die gemeenskap opgedoen. Dit sluit die versorging van bejaardes, kwesbares, babas en kleuters, en gestremdes in.
◊ Werkservaring behels die versorging van tien pasiënte met uiteenlopende probleme oor ‘n periode van ten minste drie maande.
Opleidingsmodel
Die doel van hierdie kwalifikasie is om ’n student voor te berei om geregistreerde verpleegkundiges met die fisiese en emosionele versorging van pasiënte te help. Klasse word in Afrikaans aangebied, maar sekere studiemateriaal word slegs in Engels uitgereik.
Die Tuissorgassistent-kwalifikasie is ’n ses maande kursus wat uit drie komponente bestaan: teoretiese, praktiese vaardigheids- en werkservaringmodules. Die teoretiese komponent word deur ’n ervare, geregistreerde verpleegkundige in ’n moderne en toegeruste lesinglokaal aangebied. Praktiese vaardighede word in ‘n simulasielaboratorium geleer en ingeoefen, en deur middel van werkservaring verder verfyn. Die werkservaringmodules word in diens van die gemeenskap aangewend. Studente is verplig om alle kontaksessies, waartydens die lektor die voorgeskrewe teorie met hulle sal behandel, by te woon. Klasse begin 08:00 en kan met inbegrip van pouses en middagete tot 16:00 duur. Die werkservaringmodules word onder toesig van ervare personeel in Orania verrig.
Daar word van studente verwag om op ‘n deurlopende basis ‘n werksverklaring van die werk wat hulle verrig, by te hou. Die werksverklaring word gemodereer deur QCTO wat deur HWSETA geadministreer word, wat as bewys dien dat voorgeskrewe werkservaring opgedoen is. Aan die einde sal kwalifiserende studente ’n eksterne eksamen skryf. Indien hulle slaag, sal dit hul in staat stel om as tuissorgassistente onder toesig te praktiseer.
VIR WIE IS HIERDIE KURSUS?
Tuissorgassistente help mense met basiese fisiese versorging en gee emosionele ondersteuning. Daarom is die kursus vir tuissorgassisente ideaal vir ’n persoon wat ’n sterk roeping het om ander mense te help. Die tuisversorger is ’n toegewyde persoon met ’n deernis vir ander. ’n Belangstelling in mense en versorging is aan te beveel.
HOEKOM MOET JY TUISVERSORGING OORWEEG?
◊ Die aantal bejaardes, kinders en gestremdes wat tuisversorging benodig word al hoe meer. Die fokus val deesdae op die onafhanklike funksionering van bejaardes, om hulle so lank as moontlik selfversorgend en met waardigheid in die gemeenskap te laat bly. Daarom is daar al hoe meer werksgeleenthede vir tuissorgassistente.
◊ ’n Gekwalifiseerde tuissorgassistent kan by ’n versorgingsinstansie soos ’n ouetehuis gaan werk of sy/hy kan privaat versorging in mense se huise onder toesig van ’n geregistreerde verpleegkundige doen.
◊ Die Tuissorgassistent-kwalifikasie bied die geleentheid vir mense om hulself in ’n veld te bekwaam waarin hulle met waardigheid ’n kosbare diens kan lewer. Deur die Tuissorgassistent-kursus sal jy belangrike vaardighede leer wat tot voordeel van jouself, jou gesin en jou gemeenskap sal strek.
Die registrasiefooi vir
eerstejaars vir die jaar is R1 250.
Die totale studiekoste vir
eerstejaars vir die jaar is R10 500.
* Kosteverhogings geskied jaarliks
Klasse begin 2 September 2024.
Die student se toelating tot BKO word bepaal deur vier faktore, nl.
- TOELATINGSVEREISTES
- REGISTRASIEFOOI
- TOELATINGSTOETS
- VERBLYFREG TOT ORANIA
Van Elektries na diploma in Siviele Ingenieurswese
Annalene Booyens, afgestudeerde Elektries-student by Bo-Karoo Opleiding wat tans besig is met haar diploma in Siviele Ingenieurswese, beskou haar reis by BKO as ‘n wonderlike geleentheid om te help bou aan ‘n gemeenskap en ‘n hoopvolle toekoms. Voor sy haar tuiste in Orania gevind het, het Annalene in Bloemfontein gewoon en grootgeword, waar sy by Hoërskool Sand du Plessis gematrikuleer het. In 2022 het sy na Orania getrek om haar studies by BKO te begin.
Ek was deel van Bo-Karoo Opleiding!
“Bo-Karoo Opleiding het my die geleentheid gegee om buite my gemaksone te beweeg en as mens te groei,” sê Chané Barnard, ‘n trotse afgestudeerde van die Tuisversorging-kursus by Bo-Karoo Opleiding (BKO).
Jong werkende se hart lê in Orania
Mikyla Weideman, ’n plaasdogter van Daniëlskuil, glo haar toekoms sal altyd verweef bly met Orania – die plek wat haar die geleentheid gegee het om te groei en haarself te vind.
In 2023 was Mikyla op die punt om na Bloemfontein te verhuis om sielkunde te studeer. Haar ma het egter voorgestel dat sy na Orania toe kom om as tuisversorger opgelei te word.