BKO verwelkom Janet Malherbe as lektor in ons groeiende Landbou-afdeling. Janet het Landbou aan Kovsies studeer en ook ‘n NGOS daar voltooi. Sy bring ’n ryke verskeidenheid ervaring saam met haar – van onderwyswerk in Korea, landbou-onderwyser by Landbouskool Hendrik Potgieter in Reddersburg, tot onlangse aflosonderrig.
In haar rol sal Janet klas aanbied aan landboustudente en ook prakties betrokke wees by die proefplaas, werkswinkel en alledaagse landbouaktiwiteite. Vir haar is onderrig ’n roeping: ’n plek waar kennis, lewenswysheid en menswees saamvloei. Volgens Janet soek studente vakkennis, rigting, raad en groeigeleenthede en dit is vir haar ’n eer om deel te kan wees van só ’n proses.
Janet se liefde vir landbou, haar kreatiewe benadering tot onderrig en haar dryfkrag om groei te sien gebeur, maak haar ’n waardevolle toevoeging tot ons span. Sy sien daarna uit om by BKO deel te word van iets groter en om saam te bou aan ’n instelling wat in die geskiedenis van die Afrikanervolk sal leef, om studente te sien ontwikkel en om uitdagings met ywer en geloof aan te pak.
Janet droom daarvan om te sien hoe BKO sy volle potensiaal bereik, en dit beteken vol koshuise, groeiende studente getalle en hoe Afrikanervryheid deur opleiding en arbeid versterk word.
Welkom by BKO, Janet!
