Opleiding geskied deeltyds, waartydens teoretiese-, praktiese vaardigheids- en werkservaringsmodules oor ‘n tydperk van twee jaar, afhangend van die student se vermoë, aangebied word. Studente is verplig om alle teoretiese- en praktiese werkswinkelkontaksessies in Orania by te woon, waartydens die lektor die voorgeskrewe teorie met hulle behandel. Klasse neem vyf maal per trimester vanaf 08:00 plaas en kan, met inbegrip van pouses en middagete, tot 17:00 duur. Tydens die teoretiese en praktiese klasse sal studente dus in Orania wees en ook vereis word om twee termyntoetse af te lê voor die eksterne eksamen, waarna hulle hul werkservaringmodules landswyd by enige geregistreerde kontrakteur kan verrig. Klasse word in Afrikaans aangebied, maar die studiemateriaal word in Engels uitgereik. Daar is vier vakke per N-vlak, waarvan twee vakke per trimester behandel word. Daar word drie geleenthede per jaar gegee vir studente om ekstern eksamen te skryf.

Met die voltooiing van die N6-nasionale sertifikaat kan die student die bewyse van sy/haar werkservaringmodules, wat oor ’n tydperk van 18 tot 24 maande geskied, inhandig sodat ’n aansoek vir die diploma ingedien kan word.